Sensationnell: Andy Schleck wënnt Léck-Baaschtnech-Léck!
RTL - 26.04.2009, 17:02 - Fir d'lescht aktualiséiert: 27.04.2009, 11:29
Am Cyclissem huet déi ganz Lëtzebuerger Sportswelt e Sonndeg op Léck gekuckt a méi genee op Ans.
Do ass nämlech no 261 schwéiere Kilometer den Andy Schleck als éischten iwwert d'Arrivée vu Léck-Baaschtnech-Léck gefuer.
Fir dee Jéngste vun de Schleck-Bridder ass eegenen Ausoen no ee Kannerdram an Erfëllung gaangen. Elo dreemt hien dovun eng Kéier den Tour de France ze gewannen. Bis dohi wir et awer nach vill Aarbecht sou de Gewënner vun der Doyenne vun den Ardenne Klassiker.
No senger excellenter zweeter Plaz ë Mettwoch an der Flèche Wallone war den Andy Schleck ee vun de grousse Favorite fir dës Course. Hien huet et 55 Joer nom Marcel Ernzer als 2. Lëtzbuerger an de Palmares vun dësem Klassiker gepackt.
Den Andy Schleck huet sech an der 2. leschter Montée, der Roche aux Faucons vum Peloton alleng ofgesat.
VIDEO: Den Andy am Interview no der Arrivée Zweete gëtt de Spuenier Joaquin Rodriguez, an dat mat engem Retard vun iwwer 1 Minutt.
Drëtte gëtt den Davide Rebellin.
Säi Brudder Fränk Schleck war no senger Chute e Sonndeg, a sengem Forfait e Mëttwoch och nees dobäi. Hien ass am Spëtzegrupp ukomm. Nieft dem Frank, d'lescht Joer gouf den Andy jo 3. an der "Doyenne" vun den Ardenneklassiker, war de Kim Kirchen e Sonndeg och dobäi. Hien huet eng 86 Kilometer virun der Arrivée de Contact awer zum Peloton verluer an huet opginn.
De Premier Jean-Claude Juncker huet sech et net huele gelooss dem Andy Schleck no senger Victoire perséinlech ze félicitéieren. De Jean-Claude Juncker, dee jo den Ament zu Washington ass, huet nach e Sonndegowend mam Andy a mam Fränk Schleck telefonéiert.
An och den Ausseminister Jean Asselborn huet dem Andy Schleck fir säin formidabelen Exploit gratuléiert. Dëst wier sécherlech net déi lescht Victoire vun engem grousse Champion. Dës Victoire géif eis houfreg maachen a géif op e neits beweisen, datt de Lëtzebuerger Cyclissem den Ament ee vun senge schéinsten Momenter erlieft, sou de Lëtzebuerger Ausseminister.
Et ass eng historesch Victoire, Meeschterstéck, dat den Andy Schleck réaliséiert huet, ee souveräne Vainqueur, eng grouss Victoire vun engem Athlet den um beschte Wee ass ee groussen ze ginn, ee Phénomène; dat sinn nëmmen e puer Iwwerschrëften aus den nationalen Dageszeitunge vu Méindes.
Eis Profie ware prett...an de Lëtzebuerger Public och!
Är Commentaire
